Página principal

Como bi cheriat s’anneu de sos duos urunesos caratzatos a mustatzos e otzales nieddos e trentzes biancos. Ohi sa conca!


Descargar 31.36 Kb.
Fecha de conversión09.07.2016
Tamaño31.36 Kb.
V

Nessune, mentzus de sos istelaesos, connoschet a cussos tropejales de sos urunesos. Sunt una vita gherrànnebi a chitzu partitu in cherta de los domare, e nudda. Àntzias, cuddos lis intzùgliant “tzullos”, chi cheret narrer gaddinosos; e “tzullos” lis torrant sos istelaesos.

Sos de Urune sunt a cudda moda: rudes, isconcatos, bardaneris. B’at àpitu mancamentu in su puddàgliu de tzia Mariantònia? Sas urminas nche leant a Urune. Ant furatu sas caramellas a una criatura? Issos sunt. Ant assuconatu intro de note a su vardianu de su campusantu? Semper issos, carragliatos chin letzolos biancos. E non fint issos sa bia chi aiant irrobatu s’unnacru de unu pastore e aiant postu a loddare sos nidos de su casu romanu a josso de sa pènnita de Punteddone? E canno fint istatos in cherta de nche furare sas càmpanas dae sa turre? Custa tambene est de contare, ma un’àtera bia. Pro como, pro si facher un’idea de sa tratèntzia chi b’est intra sas duas biddas est bastante custu conteddu: duos istelaesos s’imbenint e unu si fachet: “Intesu l’as su contu de novu? B’at una gherra in Terramanna e semus pretzetatos a bi tzucare”; e s’àteru: “Una gherra? E sos d’Urune chin nois sunt o contra a nois?”

Como bi cheriat s’anneu de sos duos urunesos caratzatos a mustatzos e otzales nieddos e trentzes biancos. Ohi sa conca!

Sa bidda, sos pastores, su Sòtziu e su presidente suo fint che boteddu de pìpere. Cantu aiat iscobertu Pepe Tàula non fit istatu bastante a torrare s’assèliu a onzunu in sas fainas fitianas ch’est sichinne.

–In sos ufissos de su N.A.S. non n’ischint nudda. Non ant imbiatu nessune a Istelai,– aiat natu su vitirinàriu a s’atopu ch’aiant fatu in domo cumonale. Sos mannos fachent semper atopos, abojos e “tàulas tunnas” (piàghita bos est sa tradutzione?), in uve totu tzarrant, preguntant, responnent, imprumitint, bocant iscusas, ghetant neches. Ma, a sas secu, imprastu non bi n’at. Comente fit prima, sa cosa gai matessi la lassant. Si non peus.

Su capitanu de sos barratzellos:

–Non b’at trassa de urunesu chi non connòscapo. Gamas e pastores istent chietos chi ja m’arrantzo jeo. Si cussos bardaneris s’atrivint a nche brincare sas làcanas de su sartu de Istelai, los faco che fratacasu!

–Eh, chi non ses goi disapietatu,– si fit pesata una boche.

Su sìnnicu, amustranne un’otzolu de papiru:

–Apo iscritu una punta de billete a su cumpantzu sìnnicu de Urune…

–Ja setzi rese vona, sos sìnnicos!– semper sa matessi boche de prima.

–No incumintzemas chin sas ofesas casinono bos nche catzo a foras tentos a pare!

–Tàpadda! Fassista!

–Democràticu, macari ti tzoches!

–Bella democratzia!

–Sa chi m’agradat!… E sinnuncas… sa punta de su billete est firmata chin nùmene, sambenatu e improègliu dae totu sos cussitzeris, fintzas dae cussos chi non sunt in zunta. B’est sa cundenna de su pòpulu de Istelai pro sa paca tzivilesa ch’ant de biver e de pastoricare sos bichinos nostros urunesos, e chi nos semus istracatos de aguantare.

Frùschios e tzocos de manu

Petzi tzocos de manu, imbetze, a una tropa de pitzinnos chi fint tzocheatos a sa domo cumonale chin cartellones pintatos e iscritos: – Su tzuculate est su nostru! – Urunesos tziulè! – Urunesos go home!

Sos prus cuntipitzatos fint sos pastores. Dae canno sas erveches aiant datu tzuculate fint incuntzanne de prus, si lis latiat dae su portafògliu che sonete chi lis ufraiat s’ala manca de sa jancheta. Timiant non lis esseret torratu a su sòlitu.

–Sunt in artimintzos malos, cussos murruddones de urunesos,– s’ascu- jaiant.

–Non siat chi punnent issos puru de facher tzuculate…

–… o zelatos?

–Bae chi ja ses brulleri. E si bi resessint a beru?

–Ma macu ses? Petzi sas gamas de Istelai bi sunt resessitas.

–E tanno pruite totu custu cua-cua? Pruite si sunt caratzatos e s’ant afunatu dae s’ufissu de su Sòtziu totu sos papiros e unu càmiu prenu de tzuculate?– aiat natu unu chi sa cosa l’aiat intesa in unu cochintzu de su ichinatu suo.

–Nachi fint armatos e s’ant jocatu a corfos de balla presidente e secretària.

Ma sos prus de sa bidda, cussos avesos a pessare chin sa conca issoro e non chin cherveddos antzenos, si fint abitzatos chi sos artimintzos de sos urunesos fint istatos cussitzatos dae sas Sete Sorrastras, comente amus bistu in antis. Nennedda, sa tzeraca, aiat datu tocamentu a sos duos frates suos. Sos duos frates fint annatos, aint fatu su cumannu e nche l’aiant imbiatu sas duas lamas e sos papiros chi s’aiant afunatu dae s’ufissu de su Sòtziu; e Nennedda aiat intregatu totu a sa mere.

Ma sas Sete Sorrastras non aiant iscobertu nudda, ca nudda b’aiat de iscoberrer. Sos papiros secretos, una muta fint otzolos chi Rosedda s’apentaiat a bi pintare frores e antzoneddos e coros iferchitos chin una fritza canno non aiat de travagliare; un'àtera muta sas lìteras chi Pepe l’aiat iscritu canno fit sordatanne, frischiatas in sa cassavorte; àteros otzolos, chi a sa prima fint pàssitos prenos de sas fòrmulas chi fint chircanne, sos contos chi Rosedda si fachiat de su dinari, suo e de Pepe, postu a banna pro si cujuare e de cantu galu ne li mancaiat pro sa domo chi punnaiant de allocare, de sas ratas de sos trastes e de su telivisore a colores. De fòrmulas e misturas pro facher tzuculate, mancu in locos!

Su tzuculate de sas duas lamas, imbetze, sas Sete Sorrastras l’aiant partitu e imbiatu peri sos laboratòrios de sas fàbricas issoro, in uve fint avesos a sos imbròglios e in uve resessiant a dare sapore fintzas a sa napa. Manitzatu in limbicos, caentatu e ifritatu in tubos tortos de fridu, setatzatu, mòlitu e amisturatu e lassatu pasare, su tzuculate de Istelai fit resurtatu pretzisu a sas laddaricas e a sa cascasina de erveche.

–Merde!– aiat natu su chìmicu de sa fàbrica frantzesa, tupànnesi su nare.

–This is sheat!– aiat natu su chìmicu de sa fàbrica ingresa, tupànnesi sas pinnas de su nare.

–Das ist scheiße!– aiat natu su chìmicu de sa fàbrica tedesca, tupànnesi sas pinnas de su nare.

–Mierda!– aiat natu su chìmicu de sa fàbrica ispagnola, tupànnesi sas pinnas de su nare.

–Lampu, custa est merda!– aiat natu tambene su chìmicu de sa fàbrica taliana e, pro non intenner su fracu, s’aiat tupatu sas uricras. E chin sas analis l’aint bocatu de capu.

Postu a banna s’ispionàzu industriale, un’àtera die chi si fint imbènnitas in Zinevra sas Sete Sorrastras aiant picatu pinna e tinteri, tre otzolos de papiru e aiant iscritu tres puntas de billete paris: una a su sìnnicu, s’àtera a su vitirinàriu, sa de tres a su capitanu de sos barratzellos de Istelai. A lìtera racumannata. Chin sas postas non s’ischit mai.

Intatu sos istelaesos non teniant contu de nudda. Travagliaiant che bojas, incuntzaiant bussas de dinari e tantu lis fit bastante.

Pro facher sas cosas comente si tocat, sa Rezone aiat postu su dinari pro su Primu Istitutu Superiore de su Tzuclate Istelaesu (PISTI, l’aiat incurtziatu unu brulleri), impare a su marcu DOC, e gai nessune l’aiat pòitu copiare.

B’aiat àpitu imbidias e dispetos, trassas e traitorias cuatas e nòtitas, sa die ch’aiant fatu sas botassones de su retore. Ma, a pustis de unu trabellu de fòrtzicos, retore fit bessitu Rimunnu de Cambas e su PISTI aiat imbucatu su caminu suo: iscolas pro tzeracos e lachintzajos, sas maneras prus cumbeniosas de pastoricare sas erveches chi daiant tzuculate (sas de Istelai, aiat iscritu un’issentziatu chi fit annatu a sa bidda pro las istudiare, aiant unu cromosomo chi sas àteras erveches no aiant), s’issèperu de sos mascros, sa cura de sas malatias, pacas pro bona sorte, chi lis potiant pitzicare. E tambene marketing, budget, management. In una paràula, totu, chene irmenticare nudda, tunnintzos e turvontzos puru.

Su retore Rimunnu de Cambas (nudda de l’intzugliare, pro s’amore de Deus), dae canno fit intratu in postu bragaiat in Piatza Manna chin una pinna Bic iferchita in sa butzachedda de sa jancheta. Aiat fatu sa Sagra de su Tzuculate e, a s’annu novu, punnaiat de b’apitzicare su prèmiu de poesia. Tema, est làtinu, su tzuculate.

Tifosu de su jocu de su fùbalu (onzi sàpatu sero si gastaiat milli francos a su totocàlciu), Rimunnu de Cambas aiat comporatu màglias e tutas novas a s’iscuadra de Istelai chi, dae canno fit in colore de su tzuculate non b’aiat mèdiu de perder una partita.

E s’indoto non lu contas? A la narrer de goi custa parauledda paret chi bochet sonu fartzu. Non est mancu cosa de mannicare. Ma semper dinari est. Comente? Mì, de goi.

Pichemas sos turistas. Canno mai n’aiant bistu unu in Istelai? Non isco a ite. A s’apompiare cuiles e pastores e gamas de erveches? Sunt pintos e lìmpios in totue, macari sos poetas los cantent in batorinas. O a si mirare sa creja de Babu Mannu, ingrostata e illatata dae su mentzus mastru de muru de su sèculu colatu, tale Rimunnu Carchina? Non juchent àteru in suddu, no! Sos turistas cherent cosa bona a mannicare, tramatzas de lana de antzone pro pasare bene su note, discotecas pro si cullevare e semper imbentos novos, ma chi non si n’atzapent in aterue. Nessi pro dare ischire a parentes e cumpantzos, a sa ghirata ch’ant a facher a domo issoro, chi nche sunt colatos in custu e in cuddu locu, chi sunt pènnitos a josso e artziatos a susu. E si nessune bi credet, teh, ja b’est sa pira de sas potografias ch’ant tiratu. S’imbentu novu in Istelai bi l’aiant: gamas de erveches chi daiant tzuculate!

Mancu aerent ghetatu su bannu, fintzas sos turistas de sa Costirmerarda aiant piantatu mare, barcas e tzilleris in uve si cochiant onzi note e fint artziatos tentos a pare a Istelai. Sas domos si fint prenatas de allocateris, ca sos tres albergos fraicatos a novu fint semper a isticu. Rulotes e tennas de campagna las aiant acorralatas in su campu isportivu, tantu su campionatu fit agabatu.

Totu custa tzente cheret bìvita, cartata, bestita; canno at sitis cheret cosa frisca in sos tzilleris, si perdet s’isprantèglia de sas iscarpas unu cartzulaju pro bi las torrare a assolare, cheret parruchieras e barbieris pro si facher s’arva e remonire sos pilos. Cheret… cheret unu trabellu de cosas. E còmporat, de totu: crateas, malunes, casu, sarditza, girabarchinos, trìpides, juales chi si ne buscat galu carcunu mesu pupuinatu imbolatu in sos linnàglios. E tzuculate, tzuculate, tzuculate.

Sos turistas ant dinari, si lu gastant e, pro torrare a su contu de s’indoto, sos travàglios chi si movent a inghìriu de cussa ch’est sa faina matzore (de su tzuculate in Istelai, de sas veturas in Turinu) si narat indoto.

Un’àteru rivu de dinari curriat a bia de sa bidda de su tzuculate. Custos turistas si nch’allampiaiant deretos dae sos istelaesos a su primu chinnire de concale. Sos òmines, fintzas sos pitzinnos, fint a solopatu, cartzones biancos e fracas, chintòglia de pedde de vacheta in chitzu, berrita a un’ala de su coddu; sas fèminas, fintzas sas pitzinnas, fint a costùmene a frores de onzi colore, butones de oro in sa camisa, a issallos chin fruntzas de seta e mucatores recamatos. Una pratessone goi de costùmenes marranu si sos istelaesos n’aiant bistu àtera, foras de cussas bistas a sa telivione.

–Ma it’est oje, sa festa de Babu Mannu?– si fachiant sos pitzinnos, currènnelis ifatu totu agiocatzatos.

Sos de Istelai fint a sa tzivile: sos òmines a pantaloneddos e magliones, sas fèminas a funneddas curtzas chi si lis bidiat s’imbìlicu. A sa moda. Aiant irbuitatu calassos e armoàs de sos pintzos rùsticos de sos anticos e s’aiant postu in coddos robedda chi si partiat a corriolos a sa prima lavata. Crediant de esser a sa moda, ma non s’aiant fatu sos contos chin sas brènnias de chie sa moda la fachet. Sos mastros de pannu terramannesos, non ischinne prus sa de si pessare, fint pennitos issos puru a Istelai impare a sos turistas, nch’aiant allampiatu unos cantos tzios e tzias betzas galu in costùmene e, tràcadda!, imbentata sa moda nova: a sa sarda.

E totu: ite bella, arratza de cherveddera custos mastros de pannu, la chèglio, mi la còmporo.

In Istelai, comente in totu s’Ìsula, ja s’ìschit comente annant sas fainas: dae semper sunt istatos ifatu a sos àteros che catzeddos, currenne isalenatos a limba foras e timenne de non cromper a tempus a facher cantu sos àteros ant fatu antes de issos. Ma canno cròmpent a sa barra est tardu, sos àteros sunt dae novu in caminu e issos, torra ifatu. Mai chi torcant in camineras issoro.

E gai matessi fit cumbinatu chin sa moda. Fint bellos, dèchitos e galanos e non si ne fint mancu abitzatos, fintzas a canno non bi lis aiant innafriactu sos àteros. Ma como, si cheriant ponner ifatu a sa moda, lis fit tocatu de comporare sos matessi pintzos chi aiant datu a sos bentuleris colatos dae janna in janna a collire istratzos.

Ifatu a sa surra de sa tzente in costùmene sardu a potiant mancare issos, sos sacupelistas? Sunt sos peus turistas, non los cherent in neddue, brutant, òrtulant e iscussimintzant su locu. Anneu a sa tzente pacu ne dant, ma petzi a los bider romasos in terra, iscurtos, a pilos longos, mannicanne paninos e iscatuleddas chi bocant dae s’istaca chi juchent a pala, aju n’as tue de indotare. Dormint a serenu, imbussulatos intro de unu sacu, sunt a òdiu icatu chin aba e sapone, pissant in sas contonatas de sos caminos. Cantant a chiterra cantzones chi parent ispitos orrocrànneti sas uricras. Nche los ant catzatos dae Venètzia, nche los ant catzatos dae Fiorenza, non pasant in perunu locu. Fintzas chi nche fint datos in Istelai.

–A cue mi setzis bènnitos a nuscare!– lis aiat natu su sìnnicu. –Non credetas chi inoche nch’apat prus locu de in uve bos nch’ant catzatu.

Sos sacupelistas aiant sichitu a sonare sas chiterras e a masticare paninos, che canno su sìnnicu esseret istatu s’ùrtimu de sos istelaesos. Una note lis aiat agussitu una frusa de canes de sa cussorja de Limpiddu e nche los aiat irfusatos dae bidda. Galu ant a esser currenne. Zornales e telivisiones aerent natu su chi cheriant.

–Un’ampulla de litru non ne potet capire duos!– bi l’aiat ribicata su sìnnicu a unu cronista chi l’aiat intzugliatu de esser ratzista. Maleatatos però, sos sacupelistas, fachiant unu dolu… ca sos canes de Limpiddu nono, chi s’aiant isascratu sas sannas mossicrànnelis sos archiles totu ossos.


***
Rimunnu de Cambas, retore de su PISTI e Pretu Latu, presidente de su Sòtziu Pastores de Istelai, agabata sa tzorronata s’imbeniant onzi sero a sa bessita dae s’ufissu.

–Salute e tricu, Pretu Là.

–Salute e tzuculate, Rimù.

Impare imbucaiant a bidda, arrejonannesila istradone-istradone. In Piatza Manna si sediant in su muraglione arrambatos a s’iferriata e si leghiant su zornale.

–Contu de novu b’amus oje?

Imbetze de “sas sòlitas” comente semper responniat, su sero Rimunnu de Cambas s’aiat torra lessu s’artìculu e, a zornale abertu, aiat natu:

–Teh, leghe tue matessi.

Pretu Latu aiat picatu su zornale e s’aiat lessu cantu li fit assintzanne su retore chin sa punta de sa pinna Bic. Fit una prubitzitate de veturas.

–E ite, vetura nova deves comporare?

–Ma cale vetura! Si non apo mancu su fògliu rosa,– s’aiat pòitu, su retore si nch’aiat mutzinatu sa limba chin unu mossu. Su contu de sa patente chi non fit mai resessitu a picare (tres esames e tres corcoricras) fit su puntore suo malu. Pretu Latu l’ischiat e a bias si lu leaiat a jocu.

–E tanno?

–E tanno… s’imprumitis de non ti ponner a rider, ti naro una cosa.

–Ancu si mi sichet su late!– aiat giuratu Pretu Latu, a bratzos a ruche in petorras.

–Non brulles chi so a sa sèria,– nachi su retore. –Datu cara bene b’as a cantu b’at iscritu in su zornale? Sa Fiat ti nch’iscontat su trinta pro chentu dae su preju si còmporas una vetura nova, e bastu chi li torres sa vetza.

–Ma ite ti ne faches, chene patente? O pro su PISTI est?

–E drìnghili chin custu PISTI! Primu Istitutu Superiore de su Tzuculate Istelaesu! E chi ti nch’icassat una bia pro totu,– Rimunnu de Cambas fit marranu de intenner incurtzuatu su nùmene de s’Istitutu suo. –S’istitutu est novu e novos sunt tambene machinàrios e veturas. Non che a cussa tamburlana de seschentos mùrtipra de su Sòtziu tuo, chene rota de iscorta e chene cricu. Prusaprestu, una prubitzitate de goi… ite ne dias narrer si… lu so nanne a tie chi ses su presidente… mia non ti ne boches…

–Ma chin chie ti credes arrejonanne, chin una criatura?– totu sos fòrtzicos de su retore fint incumintzanne a facher intracchiddare a Pretu Latu. –Nara, nà, s’as de narrer.

Su retore fit istatu a sa muta unu frieddu. A sas secus nche li fit bessitu:

–E si nois puru dìamus benner tzuculate chin s’iscontu? Non semus una fàbrica che a sa Fiat?

Pretu Latu si nche fit pesatu dae su muraglione e, a sa ritza, s’aiat apompiatu a su retore che canno aeret jutu sa runtza.

–Tzuculate chin s’iscontu? Prus baratu cheres narrer? No isco pruite? Sos butecheris s’impostant in dae in antis de su cantzellu note note pro esser primos su mantzanu a lu comporare.

–Ja est beru. Ma si ponimus in sos zornales chi nos collimus s’usatu… chèglio narrer, si collimus su tzuculate chi sos butecheris non resessint a benner, cussu de sas Sete Sorrastras…

–Cussu de sas Sete Sorrastras? Putziddina, nos impestat su locu,– Pretu Latu aiat gruspitu a terra. Dae sa fortza chi b’aiat postu, Rimunnu de Cambas aiat apompiatu sa matonella a in uve fit fertu su gruspiu, non l’aeret cannita. Sa matonella fit galu intrea e su retore l’aiat torratu:

–Ma non pro lu collire, no. Lu damus a sos porcos. Bastante chi a issos tambene non lis pontzat sos conos. Sos butecheris nos nche diant carrare totu su chi galu b’ant in sos macasinos, sas Sete Sorrastras diant tancare cussa fàbrica chi galu lis restat aberta e nois dìamus esser sos primos de su munnu! Ite ti ne paret?

A Pretu Latu li fit pàssitu bonu su tremesu de su retore. Pro non si li latire meta in cara aiat tussitu, s’aiat ispertatu chin sos pòddiches sos pilos de conca e aiat torratu a tussire. De li lassare sa parte manna non si la sentiat. E b’aiat annantu de suo:

–Su trinta pro chentu naras tue? Mi paret pacu. Ponimus su chimbanta e non si n’arrèjonat prus.

“Chin custu cristianu non si bi potet faeddare,” si fit pessatu su retore. L’aiat datu semper anneu chi Pretu Latu, in calesiat arrèjonu, non l’aeret tzèdita mai, ca onzi cosa chi naraiat fit che canno l’aeret preicata Bernacca. “Mai si torret a bider! Nessi nche l’apo conchinatu, trinta o chimbanta pro chentu chi siet.”

Intro de su mese chi fit sichitu sa fàbrica de Istelai si fit prenata de tzuculate antzenu. E mancu male chi su retore lis aiat fatu locu in sos unnacros de su PISTI, casinono Pretu Latu non aiat ischitu mancu in uve lu collire. E grassas a Deus chi sos porcàglios fint istatos lestros a suprire a su tzuculate, prus baratu comente fit de su mangìmene. Como de tzuculate de àteras marcas non si n’atzapaiat prus mancu brusca. Su de Istelai, su primu e su solu in totu su munnu, l’aiant pòitu benner a su preju chi lis fit agradatu de prus.

E sas Sete Sorrastras?

Sas Sete Sorrastras no est chi fint bessitas a petire sa limùsina. Cosa collita n’aiant, dinari postu a banna puru e meta, totu cuddu chi non fint resessitas a si bargaminare. Chi fit su prus. Ma totu su chi amuntonaiant prima, como si lu bidiant in su sonnu. E sicomente non fint avesas a biver a chintòglia astrinta, e si aiant unu ne cheriant deretu duos, una die, retzita sa resposta a sas tres puntas de billete chi aiant imbiatu a Istelai, totas sete, chin Nennedda sa tzeraca urunesa oto, si nche fint sèitas a intro de s’ariopranu issoro, su piloto aiat postu in motu e fint bessitas deretas catzanne focu.



A bie de in uve?


La base de datos está protegida por derechos de autor ©espanito.com 2016
enviar mensaje